Back to Main HOME Page
Klein Harte

Hoe sal ons weet
wanneer ons klein harte breek ?
en hoe sal ons dan meet
hoe diep die oopskeur was ?

Wat as dit seermaak
daar waar niemand kan regmaak ?
’n Klein hart is sag,
’n klein hart is broos,
wie sal kan troos ?

’n Klein hart verstaan nie
huil uit die maag
Partymaal net stilte
met ogies vol vrae

Ogies waarvan die blink
stadigaan verdwyn het
’n stappie waaruit die huppel
weggekwyn het

Klein koppie knik moedeloos
stap dapper weg
met trane wat vlak wil uitloop
haar gesiggie verberg

Die dodelikste
is nie ’n ander se lem
dis die besef van kanse
vir altyd verspeel

Bring my meulsteen
en ’n beker asyn
Ek het droog geween
o al die pyn


Navigation: | to TOP | KleinHarte | KleinVoetjies | ReDef |


klein voetjies

in die straatlig sien ek
klein voetjies in die sand
en dit laat my terugdink
aan die dag op die strand

toe jy effens benoud
halflyf in die see
styf aan my vashou
en ons in die golwe speel

skulp en klipoptellertjie
ek sien die wind in jou hare
ek hoor die see in jou lag
hoe kosbaar was die goeie jare

in die laatson se strale
sien ek myself in jou ogies
en ek kan nie peil nie
hoe jy tussen vreugde en hartseer kies

my gemoed is soos die herfs
vol oranje geel en goud
vol kleur na die somerseisoen
maar binnekort droog en oud

ek wil my verbeel
as ek so alleen in die aandlug stap
dat daar soutsproei aan my kleef
my wange is dan nat

die tyd dat jy op my skoot kan sit
gaan nou so vinnig verby
ek wil so graag daar vir jou wees
en saam met jou die lewe bekyk



Navigation: | to TOP | KleinHarte | KleinVoetjies | ReDef |


redef

is jy bly of verbaas
met jou siel se herdefinisie
laat dit jou verras of verdwaas
jou lewe se nuwe visie

wat is daar wat jy moet deursoek
wat is daar wat jy moet vind
is dit in ’n boek
of in die prentjie van ’n kind

is dit wat jy nou voel
deel van wat jy in die spieel moes sien
was dit van die begin af bedoel
om te wees wat jy moes bedien

is die porsie wat jy agterlaat
’n seen, is dit goed of kwaad
sal dit die een wat jy moes soog
voed, of haar uitdroog

sal jou siel sy vrede vind
of is jou potensiaal steeds toegebind
sal jy eendag skree in jou gees
nee !  …  dit kon so anders wees

los die lig om te skyn
los die oordeel uit pyn
dat jy deur trane en bloed kan sien
wat dit is wat jy moet bedien
 

Navigation: | to TOP | KleinHarte | KleinVoetjies | ReDef |


Back to Main HOME Page


© Copyright 2016: benico.co.za
| Est. 1970 |